a. Ormbostad Samlingar er ei ideell stifting med formål å ta vare på, auke og formidle kunnskap. b. Tilnærminga skal vera brei, med soge, økomuseum, natur og kulturlandskap som basis for kunnskap om livsgrunnlaget i fortid, notid og framtid. Allsidig kunnskap med eit heilskapleg syn på kropp og sjel for den beste fysiske og psykiske helse. Stiftinga skal vera til nytte for ålmenta, gjennom å formidle djupare innsikt og betre kunnskap på mange felt, så vel gamal som ny, til gamle så vel som unge. c. Kunnskapsformidlinga skal i stor grad knytast til vern og oppattbygging av garden Ormbostad, med lutar og lunnende på og ikring det gamle gardvaldet , samt områder som høver med målsetninga. Tradisjonsboren bruk av naturgrunnlaget er viktig. Stiftinga skal halde vedlike kunnskap om driftsmåtar i skogen, på jorda og på sjøen. Naturmiljø og kulturlandskap, dei gamle båtane med utstyr og naust, andre hus og gjenstandar som høyrer kunnskapsarven til, skal takast vare på. d. For å bygge eit varig livskraftig og lærerikt miljø, er det avgjerande viktig at det også er produksjon på og i tilknyting til garden som svarar til dei naturlege føresetnadane. I den samanheng skal også nytids kunnskap og arbeidsmetodar kunne nyttast for å oppnå lønsemd og gode levevilkår, så lenge dette er gjort slik at det ikkje kjem i strid med vern av helse, natur og miljø, og Stiftinga sine formål under punkt a, b og c.